በቲ በለ በዚ፣ ህወሓት ዓርሰ ቅትለት ብምፍጻም፣ ከምተመን ርእስርእሳ ዝቀጥቀጣ አካል ክዕወት ዓብይ ግደ ትጻወት አላ።

ብርግጽ ካብቲ ዕንቅጽናን ድንቁርናን ተአልያ፣ ቁሩብ ክተሰላስል እንድሕር ፈቲና ነዚ ጉባኤ ሰሪዛ ብኢሂንምሂን አፈላላያ እንድሕር አታዓሪቃ ሓደ ዕድል ክህልዋ እዩ። ሃለዋታ አድሒና ዝሓሸ ዓቅሚ ሒዛ ንቅድሚት ትግስግሰሉ ዓቅሚ ንምፍጣር ብውሑድ ነዚ ጉባኤ አናዊሓ ዝተሓናፈሹ መሓውራታ ክተሸማግል አለዋ። ይኹን እምበር ውሽጣዊ አፈላላይ ንአደባባይ ብዙሕ ወጺኡ ስለዘይፈልጥ፣ አፈላላያት ናይ ምትዕራቅ ልምዲ የብላን። ሓደ ኽልተ ዝጠቀሳ ተሃልዬን ድማ፣ ሓደ ጉጅለ ብኻሊእ ጉጅል ተዘቢጡ ካብ ጸወታ ወጻእ ዝኾነሉ ልምዲ እዩ ዘለዋ። ሎሚ ከምቀደም ህወሓት ገባሪት ሓዳጊት ዝኾነትሉ እዋን ስለዘይኾነ፣ ሓደ ጉጅለ ስዒሩ ዝወጸሉ ዕድል የለን።

ብውልቀይ ንነዊሕ እዋን፣ ህወሓት ትኽተሎ ዘላ አካይዳ፣ ልክዕ ከምታ ናይ አዲስ አበባ ካብ ውሽጣ ብዝወጹ ሰባት ተዘቢጣ ካብ መሬት ትግራይ እውን ንኽትባረር ዝዕድም እዩ፣ እናበልኩ ጸኒሐ እየ። ሎሚ ናብኡ ገጽ ንጽጋዕ አለና።